Ազգային- Հայրենասիրական Երգերու Երեկոյ

Կազմակերպութեամբ ՀՅԴ Լիբանանի պատանեկան միութիւններու Ընդհանուր վարիչ մարմինին, երէկ` չորեքշաբթի, 26 ապրիլին, երեկոյեան ժամը 8:00-ին, «Յակոբ Տէր Մելքոնեան» թատերասրահին մէջ տեղի ունեցաւ ապրիլեան ուղիով ազգային երգերու երեկոյ կատարողութեամբ արցախցիներ` «Էքս Ֆեքթըր»-ի մրցումի աւարտական փուլին հասած Եուրի Ադամեանի եւ Նարեկ Վահանեանի: Լիբանանի եւ Հայաստանի քայլերգներու ունկնդրութենէն ետք ՀՅԴ Լիբանանի պատանեկան միութիւններու Ընդհանուր վարիչ մարմինին անունով խօսք առաւ Հրայր Պարսումեան: Ան յայտնեց, որ 1915-ին թուրքը անմարդկային ամէն միջոց օգտագործելով փորձեց բնաջնջել հայութիւնը, սակայն ճակատագիրի դաժանութեան յանձնուիլ մերժող հայը ինքն իր նահատակներուն ընդմէջէն յարութիւն առած ոտքի ելաւ, շարունակեց ապրիլ, կառչած մնաց կեանքին ու ազատութեան եւ երեք տարի ետք միայն կերտեց մայիսեան անկախութիւնը, ապա ՀՅԴ-ի միջոցով կազմակերպեց «Նեմեսիս»-ի գործողութիւնը, տարաւ զինեալ պայքար` Լիզպոնի տղոց եւ իրենց ընկերներուն նման տղաք նուիրելով արդարութեան խորանին, կտրեց միջազգային լռութեան շղթան` լսելի դարձնելով պահանջատէր հայու արդար ձայնը, որ կը պահանջէ Հայոց ցեղասպանութեան ճանաչումն ու արդար հատուցումը: Շարունակելով իր խօսքը` Պարսումեան ըսաւ, որ համայն հայութիւնը Հայաստանով, Արցախով ու սփիւռքով տարաւ Արցախի ազատագրական պայքարը եւ նուիրելով իր լաւագոյն տղաքը եկաւ հաստատելու, որ մենք ենք տէրը մեր Արցախին: Ան նաեւ յայտնեց, որ տարի մը առաջ, երբ ազրպէյճանական զօրքերը անակնկալ յարձակումներու դիմեցին Արցախի դէմ, հայութիւնը դարձաւ մէկ բռունցք եւ մէկ մարմին ու ետ շպրտեց թշնամին: «Մենք հզօր ազգի զաւակներ ենք եւ չենք յանձնուիր ճակատագիրին, այլ կը կերտենք մեր ճակատագիրը ու կը պայքարինք մեր նպատակներուն համար: 24 ապրիլը մեզի համար սուգի ու ողբի օր չէ, այլ` մեր ուխտի վերանորոգման առիթ, ուր բոլորս միասին կ՛ուխտենք հաւատարիմ ըլլալ Հայ դատին», հաստատեց Հրայր Պարսումեան եւ կոչ ուղղեց ներկայ պատանիներուն ըլլալու տիպար ու բարի, մնալու հայ, հեռու մնալու օտարամոլութենէն եւ յոռի երեւոյթներէն, որովհետեւ անոնք են հայութեան ապագան եւ անոնք պիտի շարունակեն Հայ դատի պահանջատիրական երթը: Եզրափակելով իր խօսքը` Պարսումեան մաղթեց, որ արցախցի երգիչներ Եուրի Ադամեանի եւ Նարեկ Վահանեանի անսպառ ձայները մեզ տանին դէպի հոն, ուր կը գտնուի ամէն հայու սիրտն ու հոգին, դէպի երկիր, դէպի հայրենիք եւ բոլորս միասին վերանորոգենք մեր ուխտը` մնալու հաւատարիմ մեր սկզբունքներուն, մեր գաղափարներուն, մեր նպատակներուն եւ մանաւանդ մեր գերագոյն նպատակին` ազատ, անկախ եւ միացեալ Հայաստանին: Այնուհետեւ մէկուկէս ժամ տեւողութեամբ Եուրի Ադամեան եւ Նարեկ Վահանեան հանդիսատեսներուն փոխանցեցին արցախեան շունչը` մեկնաբանելով ազգային-հայրենասիրական երգերու փունջ մը, ինչպէս` «Տուն իմ հայրենի», «Ախ էն երկրի հողին մատաղ», «Հայ զինուոր», «Դաշնակ Դրօ», «Ո՛վ հայոց մայրեր», «Արա զօրավար», «Մշեցու զաւակ», «Կեանք ու կռիւ», «Արցախ», «Կարօտ», «Ելէք հերոսներ», «Արցախիս», «Ես չեմ ուզում», «Հայաստան», «Իմ Արցախում», «Գալիս եմ ետ»: Եուրի Ադամեան մեկնաբանեց նաեւ Արցախի քառօրեայ պատերազմին նուիրուած «Չսպիացող ապրիլ» երգը, որուն բառերը ինք յօրինած է, ինչպէս նաեւ կիթառի վրայ նուագելով երգեց «Թռչէի մտքով տուն» երգը: Իսկ Նարեկ Վահանեանի մեկնաբանութեամբ «Հոռովել» եւ Եուրի Ադամեանի մեկնաբանութեամբ «Արշալոյս» երգերուն տուտուկի վրայ ընկերակցեցաւ Կասիա Էճիտեան:

«Վազրիկ» Յունիս 2016

ARF BADANI բջիջային ծրագիր

appposter